Inés Rey: “Temos proxecto para poñer en marcha a segunda gran modernización da Coruña”

A alcaldesa aspira a obter o apoio maioritario da cidadanía sendo a lista máis votada 

Presentou o equipo que integra a súa candidatura ás municipais como “o próximo goberno da cidade”

A alcaldesa da Coruña e cabeza de lista dos socialistas nas eleccións do 28 maio presentou oficialmente hoxe a súa candidatura rodeada polos 26 coruñeses e coruñesas que a acompañan na lista do PSdeG na cidade. No acto interviron con ela o Delegado do Goberno en Galicia, José Ramón Gómez Besteiro, o secretario xeral dos socialistas galegos e presidente da Deputación, Valentín González Formoso, e a socialista Carmen Marón, que de xeito simbólico pecha as listas coas que Rey se presenta para revalidar a alcaldía. 

“Somos unha cidade marabillosa e cun potencial único”, indicou Rey nunha Fundación Luis Seoane ateigada de público. A candidata recordou que despois de oito anos esmorecendo, a situación mudou no 2019: “Conseguimos devolver á Coruña ao lugar que merece”, explicou a cabeza de lista dos socialistas, que recordou que este mes cúmprense tamén 40 anos da primeira vitoria socialista nunhas eleccións municipais. “Somos os socialistas os que mellor sabemos entender a esta cidade, unha cidade que recuperou a súa ambición sen complexos”, indicou. 

“Temos un proxecto para poñer en marcha a segunda gran modernización da Coruña”, dixo a rexedora nun acto no que tamén recordou as vitorias electorais de Francisco Vázquez e de Javier Losada e os cambios que supuxeron para o municipio. “Temos o mellor equipo, homes e mulleres capacitados, solventes profesionalmente e que coñecen e queren a esta cidade, e que estou segura terán a responsabilidade de formar parte do próximo goberno da cidade” destacou Rey, arropada polos 26 integrantes da súa lista. 

“Temos un proxecto progresista e de futuro para os próximos dez anos e imos a por todas para conseguir o apoio maioritario que nos permita ser a forza política máis votada e seguir apostando pola cidade con máis forza, con máis ambición e con máis orgullo” subliñou. 

Inés Rey recordou durante a súa presentación que durante os últimos catro anos executáronse investimentos en todos os barrios que superan os 75 millóns, destacando a consecución de 53 millóns de fondos europeos para poñer en marcha proxectos que están a mudar moitas rúas e prazas.

Entre os cambios máis significativos citou a apertura do CD Castrillón, as Naves do Metrosidero, a rehabilitación de Veeduría, os mercados de Durmideiras e o de Monte Alto, xa en marcha, entre moitos outros investimentos que determinan un novo modelo de cidade (con 30 rúas peonalizadas) que se estenderá ao próximo mandato. Rey destacou que nos últimos catro anos desbloqueáronse proxectos históricos, como o tren a Langosteira, o dragado da ría do Burgo ou a ampliación de Alfonso Molina, que ten xa proxecto aprobado, e acadáronse logros que determinarán o futuro da Coruña, como a consecución da AESIA, “que será o gran motor de transformación da cidade”, dixo Rey.